Dorëheqja e Joe Biden katër muaj para zgjedhjeve presidenciale të nëntorit të këtij viti nuk u lë shumë kohë demokratëve që të ndërmarrin një proces zgjedhor të mirëfilltë për të nxjerrë kandidatin apo kandidaten më të përshtatshme. NënPresidentja Kamala Harris ka shprehur dëshirën për të garuar dhe fill pas reagimit të saj zëra me peshë në radhët e demokratëve kanë shprehur mbështetjen për kandidaturën e saj. Megjithatë, kandidatura e Harris, e cila mori edhe mbështetjen e Joe Biden do të duhet të marrë miratimin final në konventën e demokratëve. Analistët në Uashington e konsiderojnë këtë thjesht një formalitet, pasi nënpresidentja është emri favorit për të fituar edhe nëse në Konventë do të ketë emra të tjerë që do të shprehin dëshirën për të kandiduar. Në fakt, stafi i fushatës së Joe Biden e ka bërë fakt kandidimin e saj, përmes ndryshimit të emrit të llogarisë financiare të fushatës, nga ‘Biden për President’ në ‘Harris për President’. Llogaria ka një fond prej 96 milionë dollarë, shumë të cilës i bashkangjiten edhe gati 50 milionë dollarë të tjerë që Harros ka grumbulluar në më pak se 24 orë nga donatorët e vegjël.