Zëvendëspresidentja e Shteteve të Bashkuara, Kamala Harris, tha se zgjedhjet presidenciale të nëntorit në këtë vend do të jenë zgjedhje mes një ish-prokuroreje dhe një “krimineli të dënuar”. Me këtë të fundit, kandidatja e pritur për presidente nga Partia Demokratike iu referua kandidatit të Partisë Republikane, Donald Trump. Harris i bëri komentet në tubimin e parë të saj zgjedhor në Uiskonsin. Një ditë më herët u bë e qartë se ajo kishte mbështetjen e shumicës së delegatëve demokratë, për t’u nominuar kandidate për presidente. Presidenti aktual, Joe Biden, i dha asaj mbështetje, pasi vetë u tërhoq nga gara për rizgjedhje. Duke folur para mijëra mbështetësve në Uiskonsin, Harris e krahasoi Trumpin me mashtruesit që ajo si ish-prokurore i kishte ndjekur penalisht. Gjatë fjalimit, ajo parashtroi edhe një sërë prioritetesh që tha se do t’i ketë në qendër të vëmendjes nëse zgjidhet presidente, përfshirë këtu: kontrollin e armëve dhe të drejtën e abortit. “A duam të jetojmë në një vend të lirë, ku sundon ligji, apo në një vend të kaosit, frikës dhe urrejtjes?”, tha ajo. Në anën tjetër, Trump reagoi me një postim në rrjetet sociale, ku tha se “Kamala Harris gënjen” dhe “shkatërron gjithçka që prek”. Ai u dënua në muajin maj për ndikim të paligjshëm në zgjedhjet e vitit 2016 dhe përballet me disa gjyqe të tjera.