Shqipëria shpenzime rekord për kanalizimet/ Por qyetetarët ende nuk furnizohen me ujë 24 orë Shqipëria shpenzon për furnizimin me ujë dhe kanalizimet më shumë se niveli që Banka Botërore vlerëson të nevojshëm për arritjen e objektivave deri në vitin 2030, por pavarësisht financimeve, një pjesë e mirë e qytetarëve ende nuk kanë ujë 24 orë në shtëpitë e tyre. Të dhënat, sipas revistës monitor, janë pjesë e raportit të Bankës Botërore “Funding a Water-Secure Future”, i cili analizon shpenzimet publike për sektorin e ujit në vende të ndryshme të botës. Për kanalizimet, Shqipëria renditet mes vendeve me akses nën mesataren globale, por me shpenzime mbi nivelin e vlerësuar të nevojshëm. Nga 40 vendet me akses të ulët të përfshira në analizë, në të njëjtën situatë ndodhen vetëm Shqipëria, Mali i Zi dhe Peruja. E njëjta tablo shfaqet edhe për furnizimin me ujë. Nga 59 vendet e analizuara, Shqipëria dhe Peruja shpenzojnë mbi nivelin e vlerësuar të nevojshëm, ndërsa furnizimi me ujë nuk mjafton.