Një pjesë e një rruge të ngarkuar në kryeqytetin e Tajlandës u shemb të mërkurën në mëngjes, duke hapur një gropë dhjetëra metra të thellë përpara një spitali kryesor dhe duke detyruar njerëzit aty pranë të evakuoheshin. Pak jashtë një stacioni lokal të policisë dhe Spitalit Vajira, në një lagje të banuar të Bangkokut, një gropë rreth 50 metra e thellë bëri që të rrëzoheshin linjat e energjisë dhe ekspozoi një tub të çarë që derdhte ujë. Dhjetëra policë dhe zyrtarë të qytetit rrethuan vendin, ndërsa një kamionçinë lëkundej në mënyrë të rrezikshme në buzë të gropës. Zyrtarët në vendngjarje thanë se shembja ka të ngjarë të ketë lidhje me shiun e rrëmbyeshëm të kohëve të fundit dhe një tub të nëndheshëm të çarë. "Ka patur një rrjedhje në tubin e ujit. Uji i dalë që andej ka gërryer dheun nën rrugë, kështu që ndodhi ky incident," tha ai, duke shtuar se nuk kishte viktima të raportuara. Një video e postuar në mediat sociale tregon disa njerëz duke vrapuar nga një zonë ndërtimi në Rrugën Samsen ndërsa rruga hapet dhe shembet, duke krijuar një gropë të madhe, të mbushur me ujë. Spitali Vajira, një strukturë mësimore për një nga universitetet më të mira mjekësore të Tajlandës, tha në një postim në Facebook se po pezullonte shërbimet ambulatore, duke shtuar se ato do të "rinisnin sa më shpejt të jetë e mundur".