Gjykata penale e Leuven në Belgjikë ka dënuar nëntë anëtarë të një bande shqiptare me burgim deri në pesë vjet. Mediat belge raportojnë se organizata kriminale e zhvillonte aktivitetin e saj në nëntë plantacione, ku kultivonin kanabis. Ndërkohë gjykata ka konfiskuar edhe 2.7 milionë euro. Dy udhëheqësit e banës që organizuan logjistikën dhe mbledhjen e të korrave morën dënimet më të rënda. Njëri prej tyre u dënua me 4 vjet heqje lirie dhe me një gjobë prej 32 mijë eurosh dhe duhet t’u kthejë palëve civile më shumë se 200 mijë euro. Autori tjetër mori një dënim me pesë vjet burg, një gjobë 40 mijë euro dhe gjithashtu duhet të paguajë rreth 200 mijë euro palëve civile. Shqiptarët e tjerë u dënuan me 30 muaj burg dhe secili me 8 mijë euro gjobë. Plantacionet ishin të vendosura në Leuven dhe perreth tij si dhe një prej tyre ishte në Antuerp. Organizata mbolli plantacionet mes tetorit 2020 dhe janarit 2023. Mijëra bimë u rritën në nëntë vendndodhje, duke prodhuar qindra kilogramë kanabis.