Avokatët mbrojtës të ish-krerëve të Ushtrisë Çlirimtare të Kosovës kanë paralajmëruar se do të apelojnë aktgjykimin e Dhomave të Specializuara të Kosovës në Hagë, o cili dënoi Hashim Thaçin dhe Jakup Krasniqin me nga 25 vite burg, Kadri Veseli me 18 dhe Rexhep Selimin me 13 vite burg. Sipas Rregullores së Procedurës dhe Provave, 30 ditë nga shpallja e aktgjykimit, palët që apelojnë vendimin e gjykatës, duhet të dorëzojnë njoftimin për apel. Brenda 21 ditësh nga njoftimi për apel, gjykatësi raportues e thërret një konferencë ku ngrihen çështje rreth apelit. Palët që parashtrojnë apel duhet të dorëzojnë brenda 60 ditësh dosjen e apelit, ku parashtrohen të gjitha argumentet dhe burime të tjera ligjore ku mbështeten arsyet e apelimit. Më pas palët dorëzojnë brenda 30 ditësh dosjen e përgjigjes, ku paraqesin argumentet ligjore të tyre, ndërsa kjo pasohet me dosjen e kundërpërgjigjes e cila merr 15 ditë afat.