Një person i armatosur qëlloi për vdekje një qytetare kanadeze ndërsa hapi zjarr në piramidat Teotihuacan të Meksikës, para se të vriste veten, thanë autoritetet, në një sulm të rrallë në një atraksion të madh turistik. Autoritetet e sigurisë thanë se 13 persona u plagosën në incident. Prokurorët vendas thanë në një postim në X se personi i armatosur ishte Julio Cesar Jasso Ramirez, një shtetas meksikan por nuk dhanë detaje të mëtejshme. Të shtënat u shënuan pak pas orës 11:00 të mëngjesit në Piramidën e Hënës, një nga strukturat më të spikatura pak jashtë Qytetit të Meksikës. Një dëshmitar okular tregon se sapo kishte zbritur nga kati i ndërmjetëm i tempullit kur dëgjoi një të shtënë dhe pa një turmë vizitorësh në panik. Dëshmitari tha se personi i armatosur qëndroi në hyrje të katit të ndërmjetëm dhe dukej se shumica e të shtënave ishte në ajër, dhe jo mbi njerëzit, ndërsa mbante një tablet në dorë dhe bërtiste. Vetë turistët, përfshirë disa me trajnim mjekësor, u ofruan ndihmën e parë të plagosurve në përpjekje për të ndalur gjakderdhjen derisa mbërritën skuadrat e emergjencave. Autoritetet e sigurisë thanë se disa nga të plagosurit ishin dërguar në spitale, përfshirë tre kolumbianë, një prej të cilëve ishte një fëmijë 6-vjeçar, si edhe shtetas amerikanë, rusë dhe brazilianë. Presidentja Claudia Sheinbaum tha në një postim në mediat sociale: "Ajo që ndodhi në Teotihuacan na dhemb shumë. Shpreh ngushëllimet e mia më të thella për të prekurit dhe familjet e tyre." Të shtënat pritet të rrisin kontrollet e sigurisë në vendet kryesore turistike dhe kulturore, ndërsa Meksika përgatitet të presë kampionatin botëror të futbollit, bashkë me SHBA dhe Kanadanë. Ngjarja pritet të tërheqë miliona vizitorë nga vende të shumta të botës. Qyteti i lashtë i Teotihuacanit ishte një nga qendrat më të rëndësishme kulturore në kontinent dhe është një nga vendet turistike më të njohura të Meksikës, duke pritur 1.8 milion vizitorë vetëm vitin e kaluar. Ndërsa Meksika ka shumë incidente me të shtëna për shkak të aktivitetit të karteleve, dhuna në atraksionet turistike është e rrallë.