Izraeli vazhdon me përgatitjet për ofensivën e gjithanshme në Gaza, ndërsa raportohet se njësi speciale të ushtrisë dhe policisë së tij kanë hyrë thellë në territoret palestineze në misione vëzhgimi dhe mbledhje informacioni për terrenin dhe infrastrukturën e Hamasit. Pika e fortë e terroristëve konsiderohet rrjeti i gjerë i tuneleve nëntokësore me një gjatësi që disa parashikime e çojnë deri në 30 mijë kilometra. Ndërkohë, përmes dy videove të publikuara në rrjetet sociale, Hamas u ka dhënë një mesazh forcave ushtarake izraelite për atë se “çfarë i pret nëse hyjnë në Gaza”. Në një video shfaqet një sulm i simuluar ndaj disa tankeve, ndërsa në videon tjetër tregohet se si Hamas ka arritur të prodhojë vetë qindra raketa anti-tank. Qindra mijëra trupa izraelite janë mbledhur në kufirin me Gazën, me një numër të madh tankesh dhe mjete të tjera ushtarake, teksa përgatiten për një ndërhyrje nga toka.