Shtetet e Bashkuara kryen sulme ajrore ndaj një celule të Shtetit Islamik në lindje të Afganistanit. Sulmi ndodhi më pak se dy ditë pasi një kamikaz i mori jetën thuajse 200 personave dhe 13 ushtarëve amerikanë jashtë aeroportit të Kabulit. Komanda Qendrore amerikane tha se sulmi me dron u krye në provincën lindore Nangahar, ku u vra një “planifikues” të Shtetit Islamik-Khorsan (ISIS-K), grup që mori përgjegjësinë për sulmin në aeroport. “Një sulm ajror ndodhi në provincën Nangahar të Afganistanit. Të dhënat e para thonë se ne kemi vrarë objektivin”, tha kapiteni Bill Urban nga Komanda Qendrore. “Ne nuk jemi në dijeni për viktima në mesin e civilëve”, tha ai përmes një deklarate. Presidenti amerikan, Joe Biden tha se do të hakmerrej ndaj ISIS-K- degë e shtetit islamik në Afganistan dhe Pakistan – në përgjigje të sulmit, ndërsa evakuimet nga aeroporti i Kabulit po vazhdojnë pasi talibanët morën kontrollin e Afganistanit. “Ne nuk do të harrojmë. Ne nuk do të harrojmë. Ne do t’iu përndjekim dhe do t’iu bëjmë që të paguani”, ka thënë Biden në një fjalim nga Shtëpia e Bardhë. Ushtria amerikane tha ndërkohë një ditë më parë se beson se ende ka “kërcënime të besueshme” kundër operacioneve të evakuimit nga aeroporti i Kabulit para afatit të 31 gushtit, kur të gjitha forcat e huaja duhet të tërhiqen nga Afganistani. Edhe zëdhënësja e Shtëpisë së Bardhë, Jen Psaki po ashtu tha se ekspertët e sigurisë kombëtare kanë thënë se një sulm i ri ka gjasa të ndodhë dhe se ditët e ardhshme “do të jenë periudha më e rrezikshme”.