Një grup hakerash, i cilësuar si APT 27 kohët e fundit ka nisur sulme kibernetike ndaj disa biznesve gjermane si dhe institucione qeveritare perëndimore. Sherbimet sekrete gjermane pas një hetimi lidhur me këtë cështje, dyshojnë se ky grup, prej kohësh ka sulmuar kompanitë gjermane në disa sektorë përfshirë edhe ato të industrisë farmaceutike dhe të teknologjisë. APT, (Advanced Persistent Threat), do të thotë kërcënim i avancuar i vazhdueshëm, ndërsa numri 27 është pseudonimi për një grup hakerësh kinezë që besohet se sulmon sektorë kritikë dhe ambasada të huaja. Sipas të dhënave që nga marsi i vitit 2021 këto hakera kishin shfrytëzuar si portë për sulmet, dobësitë në softuerin që përdoret zakonisht. Ata gjithashtu mund të depërtojnë në rrjetet e klientëve dhe ofruesve të shërbimeve. Ky rrjet ka qenë aktiv që prej vitit 2010. Grupi me bazë në Kinë thuhet se ka sulmuar edhe ambasadat e huaja për të mbledhur informacione për qeveritë si dhe sektorët e mbrojtjes dhe të teknologjisë.