Një grup rus hakerash, i panjohur më parë, qëndron pas sulmeve të vitit të kaluar në rrjetet e policisë holandeze, NATO-s dhe disa vendeve evropiane, thanë të martën agjencitë holandeze të inteligjencës. Grupi, i quajtur me nofkën Laundry Bear nga agjencitë e sigurisë, ka shumë të ngjarë të jetë mbështetur nga shteti rus, tha Agjencia e Përgjithshme e Inteligjencës Holandeze dhe Agjencia Ushtarake në një letër të përbashkët drejtuar parlamentit. "Sulmet kibernetike kundër institucioneve holandeze janë pjesë e një kërcënimi më të madh ndërkombëtar kibernetik të paraqitur nga grupi i hakerave", thanë ata në një deklaratë që detajonte përfundimet e hetimit të tyre mbi incidentet. Grupi veproi nën radar derisa u zbulua duke kryer një operacion hakerash në shtator 2024, në të cilin fitoi akses në detajet konfidenciale të zyrtarëve të policisë holandeze. Laundry Bear gjithashtu kreu spiunazh kibernetik kundër kompanive që prodhojnë teknologji të nivelit të lartë ku Rusia ka vështirësi të sigurojë akses për shkak të sanksioneve perëndimore. "Hetimi zbulon gjithashtu se Laundry Bear ka qenë përgjegjës për operacionet kibernetike kundër qeverive perëndimore dhe institucioneve të tjera që të paktën nga viti 2024", shtoi deklarata. Thuhet po ashtu se grupi ka kërkuar të marrë informacione në lidhje me "prokurimin dhe prodhimin e pajisjeve ushtarake nga qeveritë perëndimore dhe dërgesat e armëve perëndimore në Ukrainë".