Zyra e Prokurorit të Specializuar në Hagë tha se po kryen operacione në Kosovës, duke mos dhënë më shumë detaje. Mediat në Kosovë kanë raportuar se po kryen kontrolle në shtëpinë e Sylejman Selimit, ish-komandantit të përgjithshëm të Ushtrisë Çlirimtare të Kosovës. Pranë shtëpisë së tij janë parë pjesëtarë të Njësisë së Reagimit të Shpejt të Policisë së Kosovës. Përveç aksionit në shtëpinë e Sylejman Selimit, sipas Kosovapress, Specialja po realizon kontrolle edhe në shtëpinë e Hajredin Kuçit. Në Gjykatën Speciale aktualisht janë duke u zhvilluar disa gjykime ndaj ish-drejtuesve të lartë të Ushtrisë Çlirimtare të Kosovës. Deri më tani, gjykata ka dënuar ish-drejtuesin e UÇK-së, Salih Mustafa me 22 vjet burgim për krime lufte si dhe janë dhënë dënime për pengimin e drejtësisë për dy ish-figura të Organizatës së Veteranëve të UÇK-së, Hysni Gucati dhe Nasim Haradinaj. Ndër gjykimet që po vazhdon është edhe ai ndaj Kadri Veselit, ish-kryeparlamentarit Jakup Krasniqi, ish-presidentit të Kosovës, Hashim Thaçi, dhe ish-deputetit Rexhep Selimi. Ata kanë një aktakuzë të përbashkët për krime lufte dhe krime kundër njerëzimit, akuza që i kanë mohuar. Dhomat e Specializuara dhe Zyra e Prokurorit të Specializuar hetojnë krimet e pretenduara të pjesëtarëve të Ushtrisë Çlirimtare të Kosovës, të kryera kundër pakicave etnike dhe rivalëve politikë që nga janari i vitit 1998 deri në dhjetor të vitit 2000. Gjykata është themeluar në vitin 2015 nga Kuvendi i Kosovës dhe është pjesë e sistemit gjyqësor të Kosovës, por vepron me personel ndërkombëtar dhe ka selinë në Hagë.