Guvernatori i shtetit meksikan Sinaloa do të japë dorëheqjen pasi u padit në SHBA për trafikimin droge. Prokurorët në Nju Jork pretendojnë se guvernatori Rocha Moya u takua me Chapitos para zgjedhjes së tij dhe i siguroi ata se nëse zgjidhej, ai do të vendoste në pushtet njerëz të përfshirë në operacionet e tyre të trafikimit të drogës. Anëtarët e kartelit vodhën kuti votimi dhe rrëmbyen apo kërcënuan kundërshtarët që të hiqnin dorë nga gara për të siguruar fitoren e tij, sipas aktakuzës. Në një videomesazh të publikuar të premten në mbrëmje, Rocha mohoi akuzat. Në aktakuzë, prokurorët amerikanë pretendojnë se zyrtarët aktualë dhe ish-zyrtarë meksikanë ndihmuan kartelin në importimin e fentanilit, kokainës dhe drogave të tjera nga Meksika në SHBA; i mbrojtën udhëheqësit e kartelit nga hetimi dhe ndjekja penale; dhe lejuan dhunën. Në këmbim, pretendon aktakuza, të pandehurit në total morën miliona dollarë. Pas arrestimit të El Chapos, karteli u nda në dy grupe — njëri i udhëhequr nga Chapitos dhe tjetri nga Ismael Zambada Garcia, i njohur si El Mayo.