Gushti 2026 është zyrtarisht muaji më i nxehtë i regjistruar ndonjëherë në Tokë, duke tejkaluar rekordin e korrikut 2023, sipas shërbimit klimatik të Bashkimit Europian, Copernicus. Temperatura mesatare globale gjatë gushtit ishte rreth 1.65 gradë Celcius mbi nivelet paraindustriale, duke kaluar pragun kritik prej 1.5 gradë, që vendet e botës kanë synuar ta shmangin për të kufizuar pasojat më të rënda të ndryshimeve klimatike. Një muaj i vetëm mbi këtë nivel nuk do të thotë se kufiri është kaluar në mënyrë të pakthyeshme, por tregon një prirje shqetësuese. Rekordi është ndikuar nga ndryshimet klimatike, por edhe nga forcimi i fenomenit natyror El Nino, që ngroh ujërat e Paqësorit dhe çliron sasi të mëdha nxehtësie në atmosferë. Sipas ekspertëve të Copernicus, El Nino aktual po forcohet dhe mund të jetë ndër më të fuqishmit e regjistruar ndonjëherë, ndërsa ndikimi i tij më i madh në temperaturat globale pritet gjatë vitit të ardhshëm. Vala e të nxehtit në Europë shkaktoi probleme të shumta, duke prekur shkollat, sistemin shëndetësor dhe prodhimin bujqësor, ndërsa nxiti zjarre e thatësira dhe kontribuoi në mijëra viktima.