Pentagoni tha se grupi i mercenarëve rusë, Ëagner, tani në thelb nuk ekziston më pasi themeluesi i tij, Jevgeni Prigozhin, humbi jetën në një aksident ajror, javën e shkuar. "Unë mendoj se Grupi Ëagner nuk ekziston më," tha zëdhënësi i Pentagonit Gjeneral brigade Patrick Ryder gjatë një konference për shtyp kur u pyet nëse ai beson se marrëveshja e armëve mes Vagner dhe Koresë së Veriut ka përfunduar. "Unë mendoj se është mjaft e sigurt të thuhet se nuk po zhvillohen shumë negociata mes tyre," tha ai për gazetarët. "Por përsëri, problemi më i madh këtu është qeveria ruse, për të cilën Vagner punonte, në mbështetje të operacioneve në Ukrainë." Në një moment, tha ai, Grupi Vagner ishte forca luftarake më e fuqishme që Rusia kishte në Ukrainë, por tani ata janë zhdukur nga fushëbeteja ndërkohë që nuk pritet të kenë më peshën e mëparshme për sa i takon aftësisë ushtarake. Javën e kaluar, një avion Embraer-135 u rrëzua pranë fshatit Kuzhenkino në rajonin Tver të Rusisë, ndërsa fluturonte nga Moska në Shën Petersburg, duke vrarë të 10 personat në bord, përfshirë Prigozhin. Agjencia Federale Ruse e Transportit Ajror më vonë publikoi një listë me emra, e cila përfshinte edhe emrin e bashkëthemeluesit të grupit Vagner, Dmitry Utkin, dhe të punonjësve të tjerë të Vagnerit. Komiteti Hetimor i Rusisë tha të dielën se kishte përfunduar identifikimin gjenetik të personave që humbën jetën në aksident, përfshirë atë të Prigozhin.