Policia italiane ka zbuluar detaje nga aksioni i zhvilluar në bashkëpunim me policinë shqiptare ku u godit një grup kriminal I trafikut ndërkombëtar të kokainës. Rrënjët grupi I kishte në Shqipëri dhe kishte lidhje të fuqishme në Amerikën e Jugut por dhe në Evropë. Baza e grupit me 12 të arrestuar dhe 8 të shpallur në kërkim ishin në Elbasna. Ndërkohë në krye ishin dy vëllezër nga klani Cela, një nga bandat më të rrezikshme. Ata drejtonin operacionet e trafikut, përfshirë importimin, shpërndarjen e drogës dhe grumbullimin e të ardhurave, të cilat më pas dërgoheshin në Shqipëri përmes linjës së autobusëve Breshia-Elbasan. Hetimet, sipas policisë italiane, nisën në gjysmën e dytë të vitit 2020, pas goditjes së një rasti të shpërndarjes së kokainës. Më pas në vitin 2021, një nga pjestarët e këtij grupi u kap me 350 kg kokainë. Ky aksion çoi më pas në zbardhjen e plotë të rrjetit kriminal italo-shqiptar. Nga hetimet rezultoi se droga importohej nga Amerika e Jugut nëpërmjet automjeteve të modifikuara dhe shpërndahej në Itali dhe Europë. Për të siguruar furnizime të drogës, vëllezërit Cela udhëtuan në Kolumbi, Ekuador dhe Dubai, duke krijuar kontakte me furnizuesit kryesorë të kokainës.