Gjykata e Shkodrës ka caktuar masën e sigurisë “arrest me burg” për 64-vjeçarin Shqefen Ziçi, i dyshuar për vrasjen e bashkëshortes së tij të enjten e 9 korrikut, Bardhe Ziçi. Seanca u zhvillua nën drejtimin e gjyqtares Zamira Lila, ndërsa organi i akuzës u përfaqësua nga prokurorja Albulena Koliçi. Gjatë seancës, i akuzuari nuk ka dhënë asnjë deklaratë para gjykatës, ndërsa prokuroria kërkoi caktimin e masës “arrest me burg”, kërkesë që u pranua nga gjykata. Nga ana tjetër, avokati I të akuzuarit kërkoi që ndaj 64-vjeçarit të kryhet një ekspertim psikiatrik. Sipas mbrojtjes, deri në momentin e ngjarjes ai ka qenë një familjar i rregullt, së bashku me bashkëshorten kanë rritur dy fëmijë dhe kanë pasur një marrëdhënie normale, pa konflikte të njohura, urdhra mbrojtjeje apo probleme si çift. Sipas avokatit, ngjarja ka ndodhur në rrethana të pakuptueshme dhe për këtë arsye kërkohet vlerësimi i gjendjes psikike të të pandehurit. Pas arrestimit, 64-vjeçari ka pyetur efektivët e policisë, nëse ka vrarë gruan e tij, pa dhënë deklarime të tjera.