Një video virale nga mbrëmja e të martës, kur u shpall shkurtimisht ligji ushtarak në Korenë e Jugut, sjell një moment tronditës: ushtarë të armatosur që hyjnë në Asamblenë Kombëtare dhe një grua që qëndron sfiduese para tyre nën kërcënimin e armëve. "Unë nuk po mendoja asgjë ... thjesht e dija se duhej ta ndalonim këtë," i thotë BBC-së gruaja sfiduese, Ahn Gëi-ryeong. Me të mbërritur në Asamblenë Kombëtare pak pas orës 23:00, Ahn - një zëdhënëse 35-vjeçare e Partisë Demokratike të opozitës - kujton se kishte fikur dritat e zyrës për të shmangur zbulimin, ndërsa helikopterët qarkullonin lart në qiell. Në kohën kur ajo arriti në ndërtesën kryesore, ushtarët po përballeshin me zyrtarë dhe qytetarë. Kur ushtria filloi të përparonte, Ahn doli përpara. “Sinqerisht, në fillim u frikësova… por duke parë një përballje të tillë, mendova, ‘nuk mund të hesht’”. E pushtuar nga emocionet, ajo thotë se është “zemërthyese dhe frustruese ajo që ndodhi në Korenë e shekullit të 21-të”, e më pas shpërtheu në lotë.