Bashkëshortja e presidentit të rrëzuar sirian, Bashar al-Assad, Asma al-Assad, "ka paraqitur kërkesën për divorc pasi shprehu pakënaqësinë me jetën e saj në Moskë". Kështu raportojnë mediat turke dhe arabe duke saktësuar se gruaja do të dëshironte të transferohej në Londër, atje ku ka lindur. Asma, sipas zërave, "aplikoi në gjykatën ruse dhe kërkoi leje speciale për t'u larguar nga Moska". Kërkesa e saj “aktualisht po vlerësohet nga autoritetet ruse”. Zëdhënësi i Kremlinit, Dmitry Peskov, tha ndërkohë se informacionet për divorcin e pretenduar të ish-presidentit sirian Bashar al-Assad dhe ngrirjen e aseteve të tij nuk janë të vërteta. "Jo, nuk është e vërtetë" tha Peskov duke iu përgjigjur një kërkese për të konfirmuar informacionin e shpërndarë në mediat arabe. Ndërsa Asma dhe bashkëshorti i saj u larguan me fëmijët e tyre për në Moskë, pas marrjes së kontrollit të Damaskut nga rebelët islamikë, autoritetet londineze u kujtuan për të. Edhe pse ajo mban një pasaportë britanike, siç deklaroi Sekretari i Jashtëm David Lammy, gruaja e Asadit nuk është më e mirëpritur në Britani. Ky i qeverisë laburiste të Keir Starmer është një gjest politik, ndërkohë që ish-zonja e parë e sirisë rrezikon të humbasë shtetësinë. Londra kishte vendosur sanksione kundër saj dhe bashkëshortit të saj, por në rastin e Asma-s ishte kufizuar në ngrirjen e aseteve dhe jo në ndalimin e hyrjes në vend, që nuk mund të vendoset automatikisht në kushtet kur ajo ka shtetësinë britanike. Për më tepër, edhe fati i prindërve të saj është gjithashtu i pasigurt, pasi sipas disa mediave britanike ata kanë lënë shtëpinë e familjes në lagjen Acton të Londrës Perëndimore për t'u bashkuar me vajzën e tyre në Rusi.