Ministria e Bujqësisë thotë se situata sa i takon gripit të shpendëve në vend, është nën monitorim dhe kontroll, nga zinxhiri institucional për zbulimin dhe kufizimin e hershëm të përhapjes së virusit H5N1. Ministria bën me dije se përgjatë fundjavës, grupe me 7 veterinerë janë angazhuar në terren, sipas përcaktimeve të perimetrit të zonës së mbrojtjes dhe mbikqyrjes për: inventarizimin dhe monitorimin klinik të 2304 fermave, në të cilat mbarështohen 96 900 shpendë të kategorive dhe llojeve të ndryshme. Pas shpalljes se ‘alertit’, në mjediset e hapura dhe në tregjet e kafshëve të gjalla si dhe në zonën e konfirmuar pozitive janë marrë kampione për ti analizuar në Institutin e Sigurisë Ushqimore dhe Veterinarisë. Gjatë fundjavës, dhe janë analizuar 90 mostra të cilat kanë rezultuar negative. Ministria e Bujqësisë ka deklaruar se po bashkëpunon me Institutin e Shëndetit Publik, i cili po kryen një survejancë të përforcuar për infeksionet respiratore në zonën e fermës së prekur nga sëmundja, përkatësisht, për zbulimin në kohë dhe marrjen e masave kundër virusit H5N1. Sakaq, ministria njofton se masat kufizuese dhe parandaluese do të jenë në fuqi deri në përfundimin e afatit të karantinës.