Drejtësia greke ka lënë në arrest me burg Ilir Shtufin, akuzuar nga SPAK si pjesë e një grupi të strukturuar kriminal që pastronte paratë e trafikut të drogës në sektorin e ndërtimit në Shqipëri. Seanca proceduriale lidhej me masën e sigurisë që do të aplikohej ndaj biznesmenit, teksa kërkesa e palës shqiptare për ekstradimin e tij pritet të vendoset në ditët në vijim nga autoritetet greke. 53-vjeçari u paraqit paraditen e së hënës në gjykatë nën kushte të forta sigurie. Përpara prokurorit përkatës, ai deklaroi se nuk pranon të ekstradohet në Shqipëri dhe, sipas burimeve gjyqësore të siguruara nga korrespondenti i Top Channel, Aleksandër Marku, mohoi të gjitha akuzat, duke pretenduar se është përfshirë padrejtësisht në këtë çështje dhe se nuk ka pasur asnjë rol në aktivitetin e dyshuar kriminal.