Greqia po shqyrton mundësinë e ashpërsimit të rregullores së përdorimit të monopatinave elektrike që lëvizin me shpejtësi mbi 25 kilometra për orë. Ministria e brendshme prezantoi ndërhyrjet në legjislacion, ku parashikohet ndalimi i përdorimit të tyre për personat nën 18 vjeç dhe sigurim të detyrueshëm për bizneset që ofrojnë këto mjete me qira. Sipas autoriteteve, legjislacioni aktual ka boshllëk duke mos përcaktuar përgjegjësitë financiare në rast aksidentesh me ku janë të përfshira monopatinat. Qeveria greke vlerëson se përdorimi i tyre nga të miturit ka marrë përmasa të pakontrollueshme, veçanërisht në zonat urbane me densitet të lartë popullsie. Ligji i ri është në fazën përfundimtare të përpunimit dhe pritet të hidhet në konsultim publik brenda dy javëve të ardhshme, ndërsa synimi është që të miratohet menjëherë pas kësaj.