Vendimi I gjykatës së Apelit për të lënë në fuqi dënimin e Fredi Belerit, ka rikthyer përplasjet mes Athinës dhe Tiranës zyrtare. Përmes një njoftimi, ministria e jashtme greke shprehu rezerva për gjykimin me argumentin se kryetarit të zgjedhur të bashkisë Himarë iu shkel e drejta e prezumimit të pafajësisë. Po ashtu mënyra se si u paraqitën provat dhe heqja e të drejtës për të bërë betimin kanë sjellë pakënaqësi në radhët e Greqisë. “Vendimi i sotëm i Gjykatës së Apelit Tiranë vjen të vërtetojë këto shqetësimeve për nivelin e shtetit ligjor dhe mbrojtjen e minoriteteve në Shqipëri. Z. Beleris sot nuk është vetëm kryebashkiaku i zgjedhur i Himarës. Ai është gjithashtu anëtar i zgjedhur i Parlamentit Evropian. Është, pra, një detyrim i autoriteteve shqiptare që të marrin të gjitha masat e nevojshme për t'i dhënë mundësinë atij të marrë pjesë në punimet e Parlamentit Evropian, duke filluar nga seanca e parë e gjithë deputetëve , në muajin e ardhshëm, në korrik.”, thuhet në deklaratën e ministrisë së Jashtme greke. Ndërkohë vetë Beleri e cilësoi sit ë pritshëm vendimin e gjykatës ndërsa e quajti atë si një puç të planifikuar ndaj tij nga kryeministri Edi Rama.