Kryetari i Komitetit të Përbashkët Parlamentar të Stabilizim-Asociimit BE-Shqipëri, eurodeputeti i Demokracisë së Re në Greqi, Manolis Kefalogiannis do të vizitojë Shqipërinë. Të mërkurën, më 19 korrik ai do të kryesojë një takim të Komitetit ku do të diskutohet për rrugën e anëtarësimit të vendit në BE. Më pas ai do të vizitojë qytetin e Himarës dhe kryetarin e zgjedhur të saj, Fredi Beleri, i cili po mbahet në paraburgim në Tiranë, për t'u informuar “për çështjen e pronave dhe shpronësimet e pronave të banorëve të bashkisë. ” Në mbledhjen e Komitetit të Përbashkët BE-Shqipëri marrin pjesë 28 eurodeputetë, si dhe 28 deputetë të Kuvendit të Shqipërisë. Çështjet që do të diskutohen kanë të bëjnë me funksionimin e shtetit ligjor në Shqipëri, lirinë e medias, luftën kundër krimit të organizuar në Shqipëri, marrëdhëniet e fqinjësisë së mirë dhe mbrojtjen e minoriteteve. Anëtarët e Komitetit të Përbashkët do të kenë takime me kryetarin e Kuvendit të Shqipërisë, ministrin e Brendshëm, përfaqësues të partive opozitare dhe ambasadorë të vendeve anëtare të BE-së në Shqipëri. Sipas mediave greke, në qendër të diskutimeve do të jetë dosja e Belerit, për të cilin Partitë Popullore Europian kanë reaguar përmes amendimit të raportit të votuar për Shqipërinë, duke e cilësuar mbajtjen e tij në izolim si shkelje të të drejtave të njeriut.