Policia ka vënë në pranga rojën e sigurisë të bankës që u grabit një ditë më parë, pranë stadiumit “Selman Stërmasi” në Tiranë. Në pranga ka rënë Fehmi Çullhajn, rreth 60 vjeç, i cili ishte në detyrë në momentin e grabitjes. Ai akuzohet për shpërdorim detyre, pasi dyshohet se nuk ka ndërmarrë veprimet e nevojshme gjatë ngjarjes, duke i krijuar autorit mundësinë të merrte paratë dhe të largohej pa hasur pengesa. Paratë e grabitura mësohet se i përkisnin një të moshuare, e cila ishte futur në bankë për t’i depozituar, por u bë pre e grabitësit në momentet e fundit. Ngjarja ndodhi rreth mesditës, teksa sipas hetimeve paraprake, autori i maskuar mbërriti me një skuter, e la atë jashtë bankës dhe hyri në ambientet e saj, ku i mori një shumë parash qytetares. Pamjet e kamerave të sigurisë tregojnë se ai ishte i veshur me të zeza dhe mbante një skafandër motomjeti për të fshehur identitetin. Pas grabitjes, u largua në drejtim të zonës së Bllokut, pa lënë gjurmë.