Një argjendari ka rënë pre e një grabitjeje në zonën e Paskuqanit. Sipas informacioneve paraprake, dy persona të armatosur kanë hyrë në ambientet e argjendarisë dhe, nën kërcënimin e një arme të tipit kallashnikov, kanë detyruar dy punonjëset që ndodheshin brenda të dorëzonin bizhuteritë. Pasi kanë marrë sendet me vlerë, autorët janë larguar me shpejtësi nga vendngjarja me një motor pa targa. Dyshohet se ata kanë lëvizur në drejtim të Universitetit Bujqësor. Menjëherë pas marrjes së njoftimit, shërbimet e Policisë kanë mbërritur në vendngjarje, ku kanë nisur grumbullimin e provave dhe veprimet hetimore. Në të gjithë zonën e Paskuqanit dhe në drejtim të Kamzës janë ngritur postoblloqe dhe pika kontrolli për kapjen e autorëve. Deri më tani nuk janë bërë të ditura detaje mbi vlerën e bizhuterive të grabitura. Grabitja ka ndodhur në një zonë që në orarin e ngjarjes është zakonisht e ngarkuar me trafik, ndërsa grupi hetimor vijon punën për zbardhjen e plotë të rrethanave të ngjarjes dhe identifikimin e autorëve.