Google ka aktivizuar filtra përforcues në lidhje me vlerësimet e bizneseve shqiptare, pas hetimit të nisur nga Policia e Shtetit për një fushatë kundër sipërmarrjeve online me vlerësime negative për t’u prishur imazhin. Paralelisht me këtë, Google ka nisur rikthimin e vlerësimit real të bizneseve, sipas nivelit që kishin para pesë ditësh, kohë kur nisi fushatë e vlerësimeve negative ndaj një serie biznesesh, që një pjesë e protestuesve i akuzojnë si të lidhur me qeverinë. Ndërkohë, Policia e Shtetit thotë se ka identifikuar gati 200 persona dhe 300 llogari që janë treguar më aktivet në vendosjen e vlerësimeve negative për bizneset. Hetimet nisën pas kallëzimit të disa bizneseve pranë sektorit të krimit kibernetik me pretendimin e dëmtimit të imazhit përmes vlerësimeve negative për shërbimet që ofrojnë. Burime nga uniformat blu pohojnë se të gjithë po verifikohen për të përcaktuar nëse kanë vepruar në mënyrë të koordinuar dhe nëse veprimet e tyre përbëjnë elementë të veprave penale. Hetimet janë përqëndruar te veprat e mundshme penale të shpifjes, përhapjes së informacionit të rremë dhe falsifikimi kompjuterik.