Policia Kufitare ka shmangur një ngjarje të rëndë në det pranë Himarës, pasi një gomone po lëvizte me shpejtësi dhe pa asnjë person në bord. Ngjarja u regjistrua në zonën e “Kepit të Rigonit”, përballë plazhit të Llamanit. Pas njoftimit të marrë, shërbimet e Policisë Kufitare ndërhynë menjëherë për të vënë nën kontroll mjetin lundrues, i cili paraqiste rrezik për pushuesit dhe mjetet e tjera në det. Nga verifikimet rezultoi se drejtuesi i gomones, 35 vjeç, banues në Orikum, kishte rënë në det gjatë lëvizjes. Ai arriti të dalë në gjirin e Llamanit me dëmtime në këmbë dhe u transportua në spital, ku ndodhet jashtë rrezikut për jetën. Një punonjës i Njësisë Policore Detare u hodh në bordin e gomones dhe arriti ta ndalonte atë, ndërsa më pas mjeti u tërhoq në Pikën e Kalimit Kufitar Himarë për verifikime të mëtejshme.