Ministri i Drejtësisë, Toni Gogu paralajmëroi se sistemi i drejtësisë do të matet nga rezultatet që ofron për qytetarët. Në mbledhjen e përbashkët mes Këshillit të Lartë Gjyqësor dhe Këshillit të Lartë të Prokurorisë, Gogu në fjalën e tij vuri theksin te vonesat në zbardhjen e vendimeve të arsyetuara. Ai pranoi se gjatë vitit 2025 është shënuar përparim në vlerësimet etiko-profesionale të magjistratëve, por theksoi se ritmi aktual i dhënies së drejtësisë nuk mjafton. “Progres ka, por kjo nuk mjafton. Në fund të vitit do të matemi nga ajo që ndjen qytetari,” deklaroi Ministri. Një nga problemet më të mprehta, sipas tij, mbetet vonesa në arsyetimin e vendimeve gjyqësore, që në disa raste arrin deri në tre vite. Sipas ministrit, drejtësia nuk vonohet në sallë kur jepen vendimet, por vonohet nga vonesat e gjyqtarëve për zbardhjen e vendimeve të arsyetuara. Ministri theksoi se kjo çështje duhet të trajtohet me prioritet nga institucionet e sistemit, duke sugjeruar që të përfshihet në fokusin e inspektimeve tematike për vitet 2026–2027, në përputhje me Strategjinë Ndërsektoriale e Drejtësisë 2024–2030.