Zëvendësministrja e Mbrojtjes e Ukrainës, Hanna Maliar, tha thënë se “goditja më e madhe” në kundërofensivën e Kievit kundër forcave ruse nuk ka ardhur ende, por pranoi se operacioni është i vështirë pasi Moska “po hedh” gjithçka mundet në betejë për të parandaluar Ukrainën të ecë përpara. Ukraina filloi fazën e parë të kundërofensivës së saj të përfolur prej kohësh, dy javë më parë, me qëllim që të rimarrë tokat e pushtuar nga forcat ruse. Por mes raporteve për përparim të ngadaltë nga forcat e Ukrainës dhe rezistencës së ashpër nga Rusia, zyrtarët në Moskë kanë pohuar se ofensiva ukrainase ka dështuar. Ushtria ukrainase, e cila ka qëndruar e heshtur për fushatën në përgjithësi, njoftoi të hënën se ishin arritur fitore të vogla dhe tetë fshatra të çliruar deri më tani, së bashku me rreth 113 km katrorë të territorit. Por “goditja më e madhe nuk ka ardhur ende”, citohet të ketë thënë Maliar. “Operacioni në vazhdim ka disa objektiva dhe ushtria po i përmbush këto detyra”, shkroi ajo në aplikacionin e mesazheve Telegram. “Armiku nuk do të heqë dorë lehtësisht nga pozicionet e tij dhe ne duhet të përgatitemi për një duel të ashpër”, tha ajo. “Në fakt, kjo është ajo që po ndodh tani”. Presidenti rus Vladimir Putin tha në fund të javës së kaluar kundërofensiva ukrainase nuk pati ndonjë sukses domethënës. Por disa blogerë ushtarakë rusë thonë se Kievi ka bërë avancime të vogla pavarësisht se me humbje të mëdha trupash dhe pajisjesh.