Një I ri nga Tirana është arrestuar pasi në përpjekje për t’iu larguar postbllokut të policisë ka goditur me makinë një efektiv. Në pikën e kontrollit të ngritur në kryeqytet nga ana e forcave “Shqiponja” dhe “Shigjeta", tek “Ish-Fusha e Aviacionit” nga ana e policisë i është bërë shenjë ndalimi një mjeti tip “BMW”. 27 vjeçari që po drejtonte makinën nuk i është bindur urdhrit të punonjësit të Policisë dhe është larguar me shpejtësi, duke goditur me mjet efektivin. Fatmirësisht punonjësi I policisë ka marrë dëmtime të lehta dhe ndodhet jashtë rrezikut për jetën. Pas disa minuta ndjekjeje, “Shqiponjat” kanë kapur dhe prangosur 27 vjeçarin nga Tirana dhe nga verifikimi i kryer ka rezultuar se drejtonte mjetin pa patentë. Tani ai akuzohet për veprat penale “Mosbindje e punonjësit të policisë”, “Kundërshtim i punonjësit të policisë me dhunë” dhe “Drejtim mjeti në mënyrë të parregullt”.