Policia e Vlorës ka zbardhur pesë raste vjedhjesh dhe një rast tentativë për vjedhje. Ndëkaq janë identifikuar dhe vënë në pranga dhe tre autorët e dyshuar Klodjan Dule, Gëzim Çuçaj dhe Franko Pulaj. Duke u bazuar tek hetimet, dyshohet se këta persona, të maskuar me kapuçë dhe shalle, duke përdorur dorashka dhe sende të forta, kanë kryer vjedhje në qytetin e Vlorës. Konkretisht më datë 10 janar në lagjen “Partizani”, kanë thyer xhamin e një automjeti tip “Mercedes Benz” ku kanë vjedhur një palë syze me vlerë 400 euro dhe një parfum me vlerë 50 euro, ndërsa në datë 13 janar në të njëjtën lagje kanë vjedhur disa steka me cigare në një dyqan. Sakaq në datën 18 janar në lagjen “Hajro Çakërri”, kanë vjedhur 20 mijë lekë dhe steka me paketa me cigare me vlerë 80 mijë lekë në një dyqan. Vjedhjet e tyre nuk mbarojnë këtu pasi dhe në datë 19 dhe 21 janë kanë vjedhur 16 mijë lekë në një market, 30 mijë lekë dhe paketa me cigare në një dyqan si dhe kanë tentuar të vjedhin në një subjekt financiar jobankar. Në cilësinë e provës materiale u sekuestruan disa sende të vjedhura, mjetet dhe veshjet e përdorura nga autorët, për kryerjen e vjedhjeve. Mbi tre të arrestuarit rëndon vepra penale vjedhja, kryer në bashkëpunim.