Rusia lëshoi një raketë balistike ndërkontinentale nga rajoni i saj jugor Astrakhan gjatë një sulmi mbi Ukrainë, mëngjesin e të enjtes, tha forcat ajrore të Kievit, hera e parë kjo që Rusia përdor një raketë kaq të fuqishme, me rreze të gjatë veprimi, gjatë luftës. Sulmi vjen pasi Ukraina përdori raketa amerikane dhe britanike për të goditur objektivat brenda Rusisë këtë javë, diçka për të cilën Moska kishte paralajmëruar për muaj të tërë se do të shihej si një përshkallëzim i madh. Sulmi rus kishte në shënjestër ndërmarrjet dhe infrastrukturën kritike në qytetin e Dnipros, tha forca ajrore ukrainase, në një kohë të përshkallëzimit të situatës në luftën 33-mujore të nisur nga Rusia në Ukrainë. Nga deklarata e forcave ajrore nuk ishte e qartë se cfarë kishte patur në shënjestër raketa balistike ndërkontinentale dhe nëse ajo shkaktoi ndonjë dëm. Këto raketa kanë një rreze veprimi prej mijëra kilometrash dhe mund të përdoren për lëshimin e kokave bërthamore, megjithëse mund të mbajnë edhe koka luftarake konvencionale. Mbrojtja ajrore e Ukrainës dërkohë tha se rrëzoi gjashtë raketa lundrimi Kh-101 gjatë sulmit të së mërkurës. "Në veçanti, një raketë balistike ndërkontinentale u lëshua nga rajoni Astrakhan i Federatës Ruse," thanë forcat ajrore, duke detajuar llojet e armëve të përdorura në sulm. Në deklaratë nuk thuhej se çfarë lloj rakete balistike ndërkontinentale u lëshua.