Kryeministri i Izraelit, Benjamin Netanyahu, ministri i jashtëm dhe ushtria dënuan të hënën përdhosjen e një satuje të Jezu Krishtit nga një ushtar izraelit në një fshat në jug të libanit, ku banojnë të krishterë. Një foto që u shpërnda në internet gjatë fundjavës tregon një ushtar duke goditur me një vare, një skulpture të Jezusit të kryqëzuar. Kryqi ishte pjesë e një faltoreje të vogël në kopshtin e një familjeje që jetonte në periferi të fshatit, tha Fadi Falfel, një prift në Debel. "Një nga ushtarët izraelitë theu kryqin dhe bëri këtë gjest të tmerrshëm, këtë përdhosje të simboleve tona të shenjta", tha ai. Netanyahu tha se veprimet e ushtarit shkojnë kundër vlerave hebraike të tolerancës dhe se ai do të ndëshkohet. "U habita dhe u trishtova kur mësova se një ushtar izraelit dëmtoi një ikonë fetare katolike në Libanin jugor. E dënoj aktin me fjalët më të ashpra", shkroi ai në X. Ambasadori amerikan në Izrael, Mike Huckabee, tha në X se "Nevojiten pasoja të shpejta, të rënda dhe publike". Ministri i Jashtëm izraelit, Gideon Saar, tha se veprimet e ushtarit ishin të turpshme dhe të papranueshme. "Kërkojmë ndjesë për këtë incident dhe për çdo të krishterë ndjenjat e të cilit u lënduan", tha ai.