Policia spanjolle tha se kishte shkatërruar qelizën e parë të njohur në vend të lidhur me The Base, një grup supremacist i bardhë i përcaktuar si organizatë terroriste nga Bashkimi Evropian. Tre persona u arrestuan ndërsa një i dyshuar si drejtues i grupit po mbahet në paraburgim në provincën lindore Castellon, në veri të Valencias. Një numër armësh, përfshirë dy armë zjarri, shtatë armë stërvitjeje, municione, më shumë se 20 thika, pajisje taktike dhe materiale të tjera neonaziste u gjetën gjatë kontrolleve. Arrestimet vijnë ndërsa ekstremi i djathtë po rritet në spanjë, ku sondazhet tregojnë një mbështetje të të rinjve për grupet nacionaliste dhe një debat të ripërtërirë mbi të kaluarën autoritare të vendit. The Base, një grup neonazist i themeluar nga Rinaldo Nazzaro në vitin 2018 në Shtetet e Bashkuara, promovon "akseleracionizmin", një ideologji që kërkon të përshpejtojë shembjen e institucioneve demokratike përmes sulmeve të dhunshme. "Udhëheqësi i celulës spanjolle ishte në kontakt të drejtpërdrejtë me themeluesin e The Base, i cili një muaj më parë bëri thirrje për konsolidimin e celulave të shpërndara në disa vende", tha policia në një deklaratë. Policia shtoi se të dyshuarit ishin shumë të radikalizuar dhe kishin kryer trajnime paraushtarake. Ata gjithashtu kishin shprehur gatishmëri për të kryer sulme selektive dhe kishin përdorur mediat sociale për të rekrutuar simpatizantë.