Pavarësisht se fluksi i armëve të perëndimit drejt Ukrainës nuk është ndalur në më shumë se 15 muaj luftë, vendi ka marrë deri më tani vetëm raketa me rreze të shkurtër dhe mesatare veprimi për shkak të frikës se armët do të mund të përdoreshin për të goditur objektivat brenda territorit rus. Por tani, duket se Ukraina mund të ketë edhe raketat me rreze të gjatë veprimi dhe më shumë se kaq, t’i prodhojë vetë ato. "Kemi perspektiva shumë të mira për prodhimin e raketave ukrainase me rreze veprimi prej më shumë se 1000 kilometrash", tha ministri ukrainas i mbrojtjes Oleksi Reznikov. Ukraina ka marrë sasi të mëdha materialesh dhe armësh nga aleatët e saj perëndimorë, por asaj i mungojnë armët që mund të godasin objektivat ruse në distanca më të gjata. Postet e komandës, depot e municioneve dhe armët e avancuara shpesh ndodhen shumë prapa linjave të armikut. Për t'i arritur këto, armët me rreze të shkurtër veprimi nuk janë të mjaftueshme.