Sekretari amerikan i Tregtisë, Howard Lutnick, deklaroi në Forumin Ekonomik Botëror në Davos se globalizimi ka dështuar, duke kritikuar mes të tjerash edhe politikat europiane për energjinë e gjelbër, të cilat sipas tij rrezikojnë ta bëjnë Europën të varur nga Kina. Gjatë një paneli diskutimi, Lutnick theksoi se administrata Trump synon të ndryshojë modelin ekonomik global, duke nënvizuar se praktikat e zhvendosjes së prodhimit jashtë vendit në kërkim të fuqisë punëtore më të lirë janë të gabuara, ndaj modeli “amerikanët të parët” vendos punonjësit vendas në plan të parë, shembull ky, që sipas Lutnick, duhet të ndiqet edhe nga vendet e tjera. Kjo deklaratë pason kërcënimet e Trump me tarifa ndaj vendeve europiane, përfshirë Danimarkën, Gjermaninë, Francën dhe Mbretërinë e Bashkuar, deklarata të cilat shënuan rënie të menjëhershme në në tregje. Nga ana tjetër, presidenti amerikan Donald Trump do t’i bashkohet forumit , ku pritet të vërë theksin në planin e tij për paqen në Gaza, si dhe të qartësojë para liderëve europianë synimet e SHBA-ve për Groenlandën.