Një tjetër gjyqtar është shkarkuar nga Komisioni i Pavarur i Kualifikimit. Aleks Nikolli me detyrë gjyqtar në Gjykatën e Apelit të Shkodrës është shkarkuar nga shkalla e parë e vettingut, pasi për të u vunë në dukje probleme të shumta me pasurinë. Trupi gjykues që kreu procesin e rivlerësimit për gjyqtarin Aleks Nikolli përbëhej nga Brunilda Bekteshi kryesuese, Olsi Komici relator dhe Lulzim Hamitaj anëtar. Trupa e vettingut konstatoi mungesë burimesh të ligjshme dhe veprime fiktive të gjyqtarit Aleks Nikolli. Aleks Nikolli është një nga gjyqtarët që votoi për mosdënimin me burgim të përjetshëm të Dritan Dajtit, i dënuar për vrasjen e 4 policëve, gjatë masakrës së 7 gushtit në Durrës. Nga viti 2004 deri në vitin 2016, Nikolli ka shërbyer si gjyqtar në Gjykatën e Rrethit Gjyqësor, Shkodër dhe nga viti 2016 si gjyqtar në Gjykatën e Apelit, Shkodër.