Avokatët e Laert Haxhiut depozituan në gjykatë kërkesën për thirrjen e 60 dëshmitarëve në procesin gjyqësor ndaj kreut të bandës, që akuzohet për krime të rënda, që nga vrasjet, atentatet, shpërthimet me tritol dhe grabitje me armë. Procesi ndaj Haxhiut po zhvillohet i ndarë nga pjesa tjetër e bandës së tij, që u zbërthye pasi Artan Tafani vendosi të shndërrohej në bashkëpunëtor të drejtësisë dhe të rrëfejë krimet e grupit. Haxhiu, që mbahet në burgun e sigurisë së lartë në Drenovë, nuk ishte i pranishëm në seancë, teksa avokatët paraqitën listën me dëshmitarët që kërkojnë, mes të cilëve edhe babai i reperit Noizy dhe Kleviol Ahmetaj, njohur me emrin Cllevio dhe i ekstraduar pak javë më parë nga Dubai. Nga ana tjetër, prokuroria e posaçme kërkoi që marrja në pyetje e dëshmitarëve të nisë me bashkëpunëtorin e drejtësisë, Artan Tafani në seancën e radhës, që u caktua më 29 prill.