Ambasadorja e SHBA-ve në Tiranë, Yuri Kim u ka bërë thirrje paleve politike që ti japin fundi lojërave për ngritjen e Gjykatës Kushtetuese. Në një intervistë për VOA, Kim ka thënë se njerëzit s’duhet të presin zgjedhjet e ardhshme për të pasur një Gjykatë Kushtetuese funksionale. Sipas kryediplomates së SHBA në Tiranë, shqiptarët s’duhet të presin deri sa BE të marrë vendimin për çeljen e negociatave për të patur “sundimin e ligjit në vend”. “Unë nuk mendoj se njerëzit duhet të presin deri zgjedhjet e ardhshme për të pasur një Gjykatë Kushtetuese, ka deklarur Kim. Ata nuk duhet të presin derisa BE të marrë një vendim, për të pasur sundim të ligjit. Ata e duan tani. Ata e donin një vit më parë. Ata e donin katër vjet më parë. Ata e donin 30 vjet më parë. Ka ardhur koha. Ka ardhur koha. Mjaft me lojra”!”, ka thënë Yuri Kim. Intervista e ambasadores Yuri Kim do të transmetohet e plotë ditën e sotme në orën 18:00 në “Zërin e Amerikës”, në të njëjtën kohë që kryeministri Rama ka lajmëruar që do të japë qëndrimin e tij për ngjarjen e rëndë, të vrasjes së 25 vjeçarit, Klodian Rasha nga një efektiv i Policisë së Shtetit.