Gjykata e Tiranës urdhëroi lirimin e menjëhershëm të 34-vjeçares dhe foshnjes së saj 7 muajsh, duke shtyrë ekzekutimin e dënimit me 2 muaj burgim. 34-vjeçarja Dorina Sejdini u arrestua në Rinas teksa kthehej nga Gjermania bashkë me tre fëmijët e saj dhe u transferua në burgun e grave në Pojskë të Pogradecit. Ajo rezulton e dënuar me dy muaj burgim për dhunën ndaj vjehrrit të saj. Rasti ngjalli reagim të gjerë publik dhe institucional. Avokati i Popullit vizitoi 34-vjeçaren në burg dhe kërkoi verifikim të plotë të procedurave, ndërsa Presidenca bëri të ditur se po ndiqte nga afër çështjen dhe ishte e gatshme të shqyrtonte edhe mundësinë e faljes presidenciale. Në seancën e zhvilluar këtë të enjte, Gjykata e Tiranës pranoi kërkesën për shtyrjen e ekzekutimit të vendimit, duke bërë të mundur lirimin e menjëhershëm të Dorina Sejdinit nga burgu. Çështja do të vijojë të shqyrtohet në rrugët ligjore për sa i përket vendimit penal të dhënë ndaj saj dhe mundësisë që ajo të ketë përfituar nga amnistia penale.