Gjykata e Vlorës ka vendosur masën e sigurisë arrest me burg për 40 ditë për tre shtetasit e ndaluar nga policia gjatë operacionit antidrogë të koduar “Karaburuni” ku u sekuestruan 577 kg lëndë e dyshuar narkotike kanabis dhe një mjet lundrues gomone. Afati 40 ditë do të shërbejë për sigurimin e provave shetësë për të akuzuarit për trafik. Ndaj tre të ndaluarve Mandi Begaj, Herman Muçaj dhe Ëngjëllush Mukaj rëndon akuzua për "Trafikim të lëndëve narkotike". Seanca u drejtua nga gjyqtari Arqile Bashaj ndërsa prokurori i çështjes ishte Kledjan Llahaj. Gjatë seancës për masën e sigurisë tre të ndaluarit kanë deklaruar janë me arsim 8 vjecar, ndërsa Mandi Begaj ka qenë më herët i dënuar për armëmbajtje pa leje. Gjatë operacionit të zhvilluar në Karaburun në Gjirin e Dafinës, policia në një gomone të braktisur sekuestroi një sasi 577 drogë, ku pjesa më e madhe ishte kanabis, ndërsa rreth 200 kg ishin në formën e çokollatës. Operacioni në fjalë u realizua në bashkëpunim me forcat Delta dhe me skuadrat e Guardia di Finanza që veprojnë në zonën e Vlorës, në kuadër të kontrollit të territorit me qëllim parandalimin e trafikimit të lëndëve narkotike. Droga e sekuestruar, kishte si destinacion Italinë. Ndjekja nga deti dhe toka zgjati disa orë pranë Karaburunit dhe personat që ishin në bord, në pamundësi për t’i shpëtuar ndjekjes së Policisë, tentuan të braktisnin mjetin lundrues dhe të largoheshin, por u kapën dhe u prangosën gjatë ndjekjes nga Policia.