Ka nisur një gjueti thesari në detin pranë Groenlandës, në kërkim të diamantëve. Eksplorimet po kryhen nga një grup kërkuesish në bordin e anijes Sanna, për llogari të gjigandit anglo-amerikan De Beers, dhe përfshijnë një zonë 800 km të gjatë. Ato janë paraprirë ndërkohë nga një javë analiza paraprake në thellësinë e detit në arktik, nga ana e institutit gjeologjik të Groenlandës. Pjesa perëndimore e ishullit është e pasur me diamante, por De Beers do të zbulojë nëse gurët e cmuar mund të jenë cuar në det nga lëvizje të ndryshme gjeologjike. Gjigandi anglo-amerikan nxjerr ndërkohë gurë nga nëndeti në namibi, vendi ku ndodhen edhe rezervat më të pasura marine në botë, me një vlerë të përllogaritur prej rreth 80 milionë karatësh. Pasuritë natyrore të Groenlandës kanë tërhequr vëmendjen e shumë vendeve edhe pse pak projekte minerare janë realizuar deri më tani. Ishulli me sipërfaqe 2 milionë kilometra katror, mban aktualisht dy miniera, një me titan dhe një për rubinë dhe zafirë të kuq. Duke qenë territor autonom, Groenlanda po provon të amplifikojë burimet e saj të të ardhurave, përtej peshkimit dhe subvencioneve nga Danimarka. Për këtë shkak, qeveria që ka marrë pushtetin prillin e kaluar, nuk kundërshton asnjë aktivitet minerar ndërsa ka vendosur veton për shpimet në det për naftë.