Policia e Shtetit gjatë 4 ditëve të fundit për shkak të mos respektimit të masave anti-COVID ka gjobitur 2.978 qytetarë. Behet e ditur se gjatë kontrolleve janë evidentuar 2.959 qytetarë pa maskën mbrojtëse dhe prej tyre 390 janë konstatuar duke udhëtuar me automjete private me persona të cilët nuk kishin lidhje familjare apo mjete të transportit publik pa maskën anti-COVID. Sakaq me masën administrative prej 10.000 lekësh, janë gjobitur 16 qytetarë të cilët kanë shkelur orën policore. Gjatë 4 ditëve të fundit janë ndëshkuar edhe 3 subjekte të cilat ushtronin veprimtari në kundërshtim me protokollet e sigurisë. Në zbatim të masave anticovid, Policia e Shtetit apelon për të gjithë qytetarët dhe drejtuesit e mjeteve që të respektojnë orën policore, të vendosin maskën dhe të ruajnë distancimin social, ndërsa subjektet tregtare, lokalet dhe restorantet të respektojnë protokollet e sigurisë dhe orarin e mbylljes, me qëllim parandalimin e përhapjes së COVID-19.