Delegacioni i Bashkimit Europian në Shqipëri iu përgjigj gazetares së Top Channel, Anila Hoxha lidhur me rregulloren e re të Gjykatës së Posaçme, e cila ka hyrë në fuqi më 1 shtator dhe parashikon një sërë kufizimesh për gazetarët që mbulojnë çështjet e drejtësisë. Në reagim thuhet se Bashkimi Europina është në dijeni të rregullores së re të brendshme për sigurinë, rendin dhe rregullat e sjelljes në ambientet e Gjykatës së Posaçme të Shkallës së Parë për Korrupsionin dhe Krimin e Organizuar, e cila merr parasysh karakteristikat e veçanta organizative, operacionale dhe të sigurisë që lidhen me GJKKO-në dhe proceset gjyqësore të saj. Unioni Europian shfaq gatishmërinë e plotë që të vijojë të ofrojë ekspertizë të specializuar si për sistemin gjyqësor, ashtu edhe për komunitetin mediatik, në mbështetje të gjetjes së një ekuilibri të drejtë ndërmjet masave të sigurisë dhe aksesit në informacion dhe transparencës së proceseve gjyqësore, në përputhje me standardet dhe parimet evropiane. Delegacioni i Bashkimit Europian në Tiranë nënvizon se do të vijojë t’i monitorojë nga afër këto çështje në kuadër të negociatave të anëtarësimit të Shqipërisë në unionin europian.