Komiteti Shqiptari i Helsinkit vlerëson se mbajtja e Ilir Metës, Ilir Beqajt dhe Erion Veliajt në kafazin e xhamtë gjatë seancave gjyqësore në Gjykatën e Posaçme nuk është e pazuar te standardet e vendosura nga Gjykata Europiane e të Drejtave të Njeriut. Përmes një shkrese drejtuar kreut të GJKKO, Erjon Bani Komiteti i Helsinkit thotë se dy rastet që Gjykata e Posaçme i referohet Strasburgut nuk justifikojnë përdorimin e të njëjtës praktikë në tre rastet e mësipërme kolektivisht dhe pa arsyetim të individualizuar. Komiteti thekson se praktika e izolimit të të pandehurve në kafaz xhami, apo metalik, sipas vendimeve të Gjykatës Europiane të të Drejtave të Njeriut zbatohet vetëm në rastet kur të akuzuarit vlerësohen si kërcënim për rendin shoqëror, apo akuzohet për trazira masive dhe cenim të sigurisë publike. Helsinki vlerëson se shkeljet bëhen edhe më problematike nga përgjigja që ka marrë nga Gjykata e Posaçme në rastin e Ilir Beqajt. Në këtë rast, GJKKO është shprehur se nuk është kompetencë e saj, por kompetencë e Drejtorisë së Përgjithshme të Burgjeve. KShH vlerëson se futja në kafaz prej xhami nuk mund të justifikohet duke thënë se godina është mbështetur nga BE, me arsyetimin se është në masë arrest me burg dhe as me arsyetimin e përgjithshëm se vendimet e Strasburgut lejojnë kafazin e xhamit.