Paraditen e të shtunës është zhvilluar në sallën e Gjykatës Kundër Korrupsionit dhe Krimit të Organizuar seansa për masat e sigurisë ndaj 6 të arrestuarve të mega-operacionit ‘Metamorfoza’. Gjykata vendosi masën e sigurisë arrest me burg për biznesmenin Pëllumb Gjoka, Edmond Prekën, Asmer Bilalin, Ardit Hasanbegën, Oltion Bistrin dhe prokurorin Xhevahir Lita. Mësohet se biznesmeni Pëllumb Gjoka akuzohet për krijimin e kushteve për vrasjen e Gjin Boriçit dhe kushteve për vrasjen e Klenth Musabelliut, kjo e fundit e mbetur në tentativë. Këto kushte i krijoi bashkë me Dorian Dhullen, Ibrahim Licin dhe Genc Tafilin. Ai gjithashtu akuzohet për korrupsion ndaj gjyqtarëve pasi kanë penguar prokurorin Xhevahir Lita për lirimin e Behar Bajrit. Ndërkohë, shoferi i Pëllumb Gjokës, Edmomd Preka, akuzohet për vrasjen e Gjin Boriçit dhe krijimin e kushteve për vrasjen e Kleanth Musabellit, pasi e gjurmonte dhe fotografonte. Ai akuzohet gjithashtu edhe për armëmbajtje pa leje. Asmer Bilali akuzohet për sigurimin e kushteve të vrasjes së Dorian Dhules, Ibrahim Liçit dhe Genc Tafilit. Ish-polici Ardit Hasanbega, ishte gjithashtu pjesëmarrës në sigurimin e kushteve për vrasjen e Dorian Dhules dhe Ibrahim Liçit. Oltion Bistri akuzohet për shpërdorim detyre dhe zbulim të akteve sekrete, pasi dyshohet se komunikoi me Pëllumb Gjokën, të cilit i ka dhënë direktiva për mbylljen e lokalit të lojërave të fatit të kryeqytet. Xhevahir Lita akuzohet për korrupsion pasi ka marrë para për të liruar Behar Bajrin. Filli që i bëri bashkë personazhe të botës së krimit, prokuror, ish-oficerë e zyrtarë të lartë të policisë ishin komunikimet në telefon. Në dorë të SPAK kanë rënë komunikime që ata kanë pasur në rrjetet “Sky” dhe “ENCroChat’ të cilat u dorëzuan nga autoritetet Franceze. Në këto komunikime ata flasin hapur mes tyre për vrasje, atentate dhe korrupsion. Nga 15 persona për të cilët Gjykata e Posaçme nxori urdhër-arreste, policia vuri në pranga vetëm 6 prej tyre, dy prej të cilëve në flagrancë.