Gjykata e Posaçme ka vendosur të kthejë për plotësim hetimesh çështjen e ‘SASPAC’, me të pandehur ish ministrin e Shëndetësisë Ilir Beqaj që ndodhet në masën e arrestit me burg. Kërkesa e SPAK që dosja të kalojë për gjykim është rrëzuar, ndërsa gjykata i ka caktuar detyrat prokurorisë duke i lënë afat deri më 30 tetor për të plotësuar hetimet . Brenda tre muajsh, SPAK duhet të përkthejë aktet që janë në gjuhën angleze, ekspertim teknik dhe ekonomik, si dhe të saktësojë cilësimin juridik të akuzave. Për dosjen SASPAC, të vetmit që mbahen në arrest me burg janë Ilir Beqaj dhe Ermal Kurtulaj. Teksa pret lirimin nga Gjykata e Lartë, pak ditë më parë ish ministrit të Shëndetësisë Ilir Beqaj iu rrëzua sërish kërkesa nga Apeli i Posaçëm për zëvëndësimin e masës së sigurisë. Ish-funksionari mbahet nën masën arrest në burg për dosjen e SASPAK që prej korrikut të vitit 2024. Ndaj ish-ministrit rëndojnë disa akuza, mes tyre “korrupsion pasiv”, “shkelje e barazisë në tendera”, “falsifikim dokumentesh” dhe “fshehje pasurie”, ndërkohë që në GJKKO vijon gjyqi në themel për dosjen tjetër, atë të “Sterilizimit”.