Gjashtë kilometra larg kufirit rus, në Poloninë veriore, një administratore zyre, Anjezka Jedruszak po gërmon një llogore. E shtyrë nga frika e luftës me Rusinë, ajo dëshiron të jetë në gjendje të mbrojë familjen e saj, përfshirë djalin e saj 13-vjeçar. Mijëra polakë si Jedruszak po regjistrohen për stërvitje ushtarake vullnetare, ndërsa ushtria e Polonisë kërkon të mbushë radhët e saj me personel profesional dhe vullnetar mes shqetësimeve në rritje për agresionin ushtarak të Rusisë. "Do të bëja gjithçka për ta mbajtur fëmijën tim të sigurt. Dhe patjetër do të doja të luftoja për ta mbrojtur atë", tha Jedruszak, e veshur me uniformë ushtarake, me fytyrën e lyer me ngjyra kamuflazhi. Për shumë njerëz në Poloni, një vend që duroi dekada të dominimit të Moskës nën Bashkimin Sovjetik, frika nga një sulm rus është e madhe. Këto shqetësime janë rritur vetëm këtë javë pasi Polonia rrëzoi dronë rusë në hapësirën e saj ajrore, hera e parë që një anëtar i aleancës ushtarake të NATO-s dihet se ka hapur zjarr gjatë luftës së Rusisë në Ukrainë. Kremlini këtë javë akuzoi vendet perëndimore për një 'mbingarkesë emocionale' dhe armiqësi ndaj Rusisë, e cila tha se nuk përbënte kërcënim për to ndërkohë që ka refuzuar të bëjë komente për incidentin me dronët. Stërvitja ushtarake e Jedruszak u zhvillua në Branievo, në një vend stërvitjeje për tanket K-2 të Koresë së Jugut, pasi Polonia porositi 180 prej tyre në vitin 2022 sipas një marrëveshjeje të madhe bashkëpunimi ushtarak. Më shumë se 20,000 polakë u regjistruan për trajnim ushtarak vullnetar në shtatë muajt e parë të 2025. Ndërkohë zyrtarët ushtarakë presin që rreth 40 mijë vullnetarë të përfundojnë trajnimin ushtarak deri në fund të këtij viti. Që nga fillimi i luftës në vitin 2022, Polonia ka më shumë se dyfishuar shpenzimet e saj të mbrojtjes nga 2.2% e prodhimit ekonomik në 4.7% këtë vit duke lënë pas vende më të mëdha evropiane si Gjermania, Franca dhe Britania.