Alarm i kuq dhe portokalli për motin e keq është lëshuar në të gjithë italinë dhe do të mbetet në fuqi deri të martën. Një valë moti të keq ka shkatërruar pjesë të Italisë dhe Francës qendrore, me stuhi dhe reshje të dendura shiu që pritet të godasin jugun e Italisë deri të martën. Rajoni italian i Emilia Romagna-s deri më tani është goditur më rëndë, me më shumë se 160 milimetra shi që kanë rënë në qytetin e Bolonjës. Një person ka humbur jetën pasi një makinë u përfshi nga përmbytjet në qytetin e afërt Pianoro, ndërsa në Castel Maggiore ushtria u dërgua për të mbështetur Departamentin e Zjarrfikësve dhe Mbrojtjen Civile në shpëtimin e banorëve. Më shumë se 300 ndërhyrje të zjarrfikësve u kryen në Emilia Romagna, veçanërisht në Bolonjë, ku rrjedhat Ravone, Savena dhe Zena, si dhe lumi Icice, dolën nga shtretërit. Banorët u evakuuan edhe në komunën Cadelbosco di Sopra pas vërshimit të përroit Crostolo, një degë e lumit Po. Në ishullin italian të Siçilisë, shërbimet e urgjencës shpëtuan njerëz nga çatitë e shtëpive dhe automjetet e bllokuara mes ujit, pasi shiu i dendur shkaktoi përmbytje. Në provincën e Agrigentos, lumi i fryrë Salto doli nga shtrati në disa vende, duke përmbytur një pjesë të qytetit bregdetar të Licata-s. Në Firence, lumi Elsa i Toskanës gjithashtu kapërceu brigjet dhe banorët janë këshilluar të shmangin udhëtimet jo të domosdoshme. Ndërkohë, në Francën qendrore përmbytjet e mëdha kanë shkaktuar dëme të shumta dhe ndërprerje të energjisë elektrike. Fshati i vogël Limony, në Francën juglindore, është prekur veçanërisht rëndë nga përmbytjet masive. Situata e rënduar vazhdon që nga e premtja dhe tani që reshjet janë ndalur, shumë banorë janë kthyer për të gjetur shtëpitë e tyre të shkatërruara nga përmbytjet. Agjencia franceze e motit Meteo France tha se 685.8 milimetra shi ranë në 48 orë në disa zona të vendit.